ياليت الزمن يرجع ورا ولا الليالي تدور
ويرجع وقتنا الاول وننعم في بساطتنا
زمان اول احسه فيه صدق شعور
نحب ونخلص النيه وتجمعنا محبتنا
زمن مافيه لاغيبه ولاحتى نفاق وزور
ياليته بس لو يرجع ونسترجع طفولتنا
صغار قلوبنا بيضا نعيش بعالم محصور
ولا نعرف ابد اغراب مغير عيال حارتنا
صحيح صغار في التفكير ولكن ماعلينا قصور
نخطط نكسر اللعبه وتسعدنا شقاوتنا
لعبة التلفون الخربان ...أو تلفون خربان لعبه كنا نلعبها وحنا صغار...نجلس بجنب بعض..وكل واحد يقول للي بجنبه جملة ..مثلاً:حليت الواجب ورحت للمدرسة .
كل واحد مننا يركّز قبل لايقوله اللي بجنبه الجملة ..علشان يسمعها بشكل صحيح..وينقلها بشكل صحيح . لأنه إذا أخطأ في نقلها وكان هو المتسبب ..يتم استبعاده.
المهم الجملة هذي تمشي من أول طفل ...الى أن تصل الى آخر طفل ..طبعاً تنتقل بصوت خافت ...وكل واحد يحرص انه يسمعها صح وينقلها صح...وإذا وصلت لآخر طفل ..نطلب منه التحدث بصوت واضح عن الجملة ..أغلب الأحيان تطلع جملة خاطئة ..مثلا الجملة السابقة : حليت الواجب ورحت للمدرسة ...يقولها آخر طفل:رميت الباب ورفعت المكتبه
وهنا يبدأ البحث عن المتسبب بالخطأ ..ونرجع من الطفل اللي قبله ويقول بصوت واضح وش سمع ....لين نوصل للمتسبب بالخطأ..ونعرف انه هو من خلال اللي قبله اذا قال الجمله بشكل صحيح..وبعدها يتم استبعاده من اللعبه ..وهكذا .
يالله يا ذيك الأيام...براءة الطفولة ..وطهارة القلوب ...وشقاوتنا
طرى على بالي كتابة الموضوع بعد مالعبت هاللعبة قبل فترة مع بزاريننا
قعدت بوسطهم ...ولعبت معهم ..وسط الضحك ...على اللي ينقل الجملة خطأ..ويطلع وهو زعلان
شعرت بشعور أليم جداً ..يوم تذكرت الفارق بين الصغار إذا لعبوا اللعبة هذي ..والكبار .
طهارة القلب ..وصفاء النفس ..وطيب الخاطر ..أمور أثّرت عليها عوامل عديدة مع مرور الزمن عند بعض اللي يلعبون اللعبه هذي يوم كبروا.
هل دار ببالكم أن ما يحصل داخل اللعبة
يحصل فعلاً خلال حياتنا الواقعية ..؟
فكلماتنا يحصل لها تشويش "وتحريف"
كلما انتقلت من شخص إلى آخر،
حتى تتشوه تماماً بعد فترة من تناقلها.
ينقلون الجملة وبعض الأحيان (الخبر) ..بدون أدنى مراعاة لشروط (اللعبة) !
فلا حرص على الاستماع ...ولا اهتمام بالنقل !
ومايهمهم أي شئ ..خصوصاً انهم ضامنين انهم ماراح أحد يستبعدهم من اللعبة ...كما كانت في السابق .
أخبار وأحداث كثيرة ..يتناقلها الكبار (كما في لعبة تلفون خربان )..وتصل خاطئة .
قال تعالى ( يا أيها الذين آمنوا إن جاءكم فاسق بنبأ فتبينوا أن تصيبوا قوماً بجهالة فتصبحوا على مافعلتم نادمين )..الآية
قضايا كثيرة في مجتمعنا ..أصبح بعضنا يتناقلها على طريقة (تلفون خربان)...
لكم احترامي
دمتم بود
